على واحدة ونص

بسم الله الرحمن الرحيم

صباح الفل والورد والياسمين

متستغربوش يا جماعة أصلي صاحية فايقة جدا نمت بدري وصحيت بدري قولولي نمت بدري ليه؟

أقولكم انا كنت مسافرة وجيت قلت افتح التلفزيون قبل ما انام اهو تغير يعنى ومكنتش قادرة افتح الكمبيوتر قلت اريح شوية وافتح التلفزيون بينى وبينكم كده الواحدة من زمان مفتحتش التلفزيون واهو اشوف الدنيا فيها ايه جديد .....

المهم ما علينا مطولش عليكمامبارح شفت حلقة معادة من برنامج القاهرة اليوم بيقدمه عمرو أديب اعتقد ان أغلب الناس مننا يعرف البرنامج ده هايل جدا ومش بيهمه حاجة وبينتقد أي حد ومش بيهمه وبيقولللأعور انت أعور في عينه ما علينا المهم عمرو أديب استضيف نائب محترم من بتوع مجلس الشعب المحترمين اللى المفروض اننا بنرشحهم ومش بنشوف وشهم بعد كده المهم النائب ده جاي يتكلم في قضية مهمة جدا جدا ........ طبعا عاوزين تعرفوا ايه هيه القضية دي؟؟

البيه المحترم واضح انه مثقف اوى وفنان كبير جدا البيه ده راح مسرحية للفنانة القديرة فيفي عبدهوجاي بقى يعرضلنا مشكلة في المسرحية دي ان الراقصة اللولبية بترقص بدون تحشم وبتقول عبارات مش هيه يعنى في المسرحية طبعا مقدرش اقولكم عليها ....... سيبكم يا جماعة انا مش جاية اقولكم موضوع المسرحية ومش جاية اتكلم فيها من اساسه أنا بس بسأل سؤال يعنى هيه البلد مفيهاش حاجة تانية النائب المحترم ده يتكلم عنها ؟؟؟

يعنى هو سايب الغلاء اللى احنا فيه واستغلال الحكومة للشعب وهروب الشباب بالهجرة الغير شرعية والبطالة وغيره و غيره وجاي يتكلم عن واحدة رقاصة ياعم عيب عليك ده انت نائب محترم؟؟؟ثم انك داخل مسرحية لواحدة رقاصة عاوز تتفرج على ايه؟؟؟

وبعدين عاوزها ترقص باحتشام ازاي ولا مؤاخذة ؟؟؟ يعنى والله نفسي افهم وجهة نظر سيادته البيه فاضي اوى ولا على باله وسايبننا مطحونين من الغلاء ورايح يتفرج على رقاصة ولا عشان فيفي عبده كبرت وراح عليها الزمن معدتش عجباك ما تستغربوش من كلامي انا طبعا مش بدافع عن الرقاصة يا جماعة أنا بس جاتلي حالة من القرف والاشمئزاز عن البلاوى اللى في بلدنا ولا هو شعار البلد دلوقت على واحدة ونص عشان كده قفلت التلفزيون ورحت نمت من حرقة دمي وصحيتلكم فايقة بقى وقلت احكليلكم معلش طولت عليكم بس كان لازم اتكلم واقول اللى في نفسي

يلا بقى سلام